Чорабинии тантанавӣ бахшида ба 27-умин солгарди Рӯзи Конститутсияи Ҷумҳурии Тоҷикистон
Санаи 5-уми ноябри соли 2021 дар Раёсати Бонки давлатии амонатгузории Ҷумҳурии Тоҷикистон “Амонатбонк” бахшида ба 27-умин солгарди Рӯзи Конститутсияи Ҷумҳурии Тоҷикистон таҳти унвони «Аҳамияти Конститутсияи Ҷумҳурии Тоҷикистон дар ташаккули низоми қонунгузории мамлакат» чорабинии тантанавӣ баргузор гардид.
Дар оғози чорабинӣ Раиси Раёсати БДА ҶТ “Амонатбонк” мӯҳтарам Икромӣ С.С. кулли кормандони Бонк ва дар симои онҳо мардуми сарбаланди кишварро бо Рӯзи Конститутсия табрику таҳният гуфтанд.
Қайд карда шуд, ки Конститутсияи Ҷумҳурии Тоҷикистон ҳамчун бахтномаи миллат санади ҷовидонаи тақдирсоз аст, ки рамзи соҳибдавлативу соҳибихтиёриро ифода намуда, зиндагии ободу осудаи сокинони саодатманди ватанамонро кафолат медиҳад.
Дар Конститутсия таъмини соҳибихтиёрӣ, истиқлолият ва тамомияти арзии Тоҷикистон вазифаи асосии давлат эълон шуда, дар айни замон ба хотири ҳимояи ин арзишҳои конститутсионӣ ва ташаккули муназзаму муътадили давлати навини тоҷикон тағйирнопазир будани шакли идораи кишвар, тамомияти арзӣ, моҳияти демократӣ, ҳуқуқбунёдӣ, дунявӣ ва иҷтимоии давлат аз ҷумлаи мақсадҳои бунёдии Конститутсия эътироф гардид.
Аҳамияти таърихии Конститутсия, пеш аз ҳама, дар он ифода мегардад, ки ин санади сарнавиштсоз барои таъмини сулҳу субот ва ваҳдати миллӣ замина гузошт ва омили асосии кафолати устувории ҳаёти сиёсии ҷомеаи Тоҷикистон гардид.
Ҳамзамон дар чорабинӣ меҳмони даъватшуда, аъзои гурўҳи корӣ оид ба таҳияи лоиҳаи Конститутсияи Ҷумҳурии Тоҷикистон, доктори илмҳои ҳуқуқшиносӣ, профессор Исмоилов Шавкат Маҳмудович ва мушовири Раиси Раёсати Бонк дар Департаменти бехатарӣ ва кор бо қарзҳои мушкилситон, номзади илмҳои ҳуқуқшиносӣ Фатҳиддинов Вайсиддин бо маъруза баромад намуда, иброз доштанд, ки Конститутсияи Ҷумҳурии Тоҷикистон инъикоскунандаи воқеияти даврони истиқлолу озодии Ватан, рушди давлат ва пешрафти миллати тамаддунсози тоҷик ба ҳисоб рафта, қабули Конститутсияи Тоҷикистони соҳибистиқлол, аз ҷумлаи муҳимтарин рӯйдодҳои таърихи навини халқи тоҷик ва дастоварди бузурги мардуми кишвар мебошад. Таҷрибаи қабули конститутсия дар давлатҳои ҷаҳон, аз ҷумла дар Тоҷикистони мо баръало нишон медиҳад, ки он ҳамчун ҳуҷҷати бисёр муҳими сиёсӣ ва санади олии ҳуқуқӣ бо истиқлоли давлатӣ робитаи ногусастанӣ дорад.
Мардуми саодатманди Тоҷикистон бо шукргузорӣ аз ҳама арзишҳои миллӣ, дар асоси дастуру роҳнамоиҳои бевоситаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон ва риояи меъёрҳои Конститутсияи Чумҳурии Тоҷикистон барои боз ҳам ободу зебо гардидани кишвари соҳибистиқлоламон саъю талош меварзанд.
